Thursday, February 17, 2011

சில கனவுகள்...

சமிபத்தில் இன்செப்ஷன் (INCEPTION) என்கிற பிரபலமான ஆங்கிலப் படத்தைப் பார்த்தேன். ஒருவரின் உள்ளுணர்வுகள் மூலம் அவரின் கனவிற்குள் நுழைந்து நாம் செயல்படுத்த நினைக்கும் எண்ணங்களை அவரின் கனவாக விதைப்பது தான் படத்தின் மையக்கரு. இந்தப் படத்தின் பாதிப்பினால் நம் அரசியல் தலைவர்களின் கனவிற்குள் நுழைந்து நான் சில கனவுகளை விதைப்பது போல் கனவு கண்டேன்.

சோனியா காந்தியின் கனவில்:
மீனவர்கள் மீது அவருக்கு உள்ள வெறுப்பின் உள்ளுணர்வை கலைத்து விட்டு அவர்களும் நம்மைப் போல சுதந்திரமாக வாழ்வது போன்ற
கனவையும், 50-களின் தொடக்கத்தில் இருந்த காங்கிரஸ் கட்சியின் ஒற்றுமையும், பலமும் இப்போதுள்ள கட்சிக்கு இரட்டிப்பாக கிடைப்பது போன்ற கனவையும் விதைக்கிறேன்.
மன்மோகன் சிங்கின் கனவில்:
கட்சியில் உள்ள தலைவர்களுக்கு தலையாட்டும் பொம்மையாய் இருக்காமல் தனது சுய அறிவையும், ஆற்றலையும் பயன்படுத்தி புதிய
பொருளாதாரக் கொள்கைகளை வகுத்து, ஊழலை ஒழித்து இந்தியாவை மிகப் பெரிய வல்லரசு நாடாக ஆக்குவது போன்ற கனவை விதைக்கிறேன்.
அ.ராசாவின் கனவில்:
விடிந்தால் மரண தண்டனை என்கிற மரண பயத்தில் ஸ்பெக்ட்ரம் விவகாரத்தின் ஆரம்பம் முதல் இறுதி வரை நடந்த ஊழல்களை உள்ளது உள்ளபடி ஒரு நீண்ட அறிக்கையை வெளியிடுவது போன்ற கனவை விதைக்கிறேன்.
கலைஞரின் கனவில்:
கழக உடன் பிறப்புகளே, தமிழக மக்களே, இது நாள் வரை என் வளர்ச்சிக்கும், என் குடும்ப வளர்ச்சிக்கும் மட்டுமே என் அதிகாரத்தையும், ஆற்றலையும் பயன்படுத்தி வந்ததையும், கழகத்தின் சட்ட திட்டங்களையும், ஒழுங்கு நடவடிக்கைகளையும் எனக்கு தகுந்தாற் போல் தளர்த்திக் கொண்டதையும் அனைவரும் அறிவீர் என்பதை நான் நன்கு அறிவேன். இருந்தும் இன்னமும் என்னை தி.மு.க எனும் பேரியக்கத்தின் தலைவராகவும், மாநில முதல்வராகவும் தொடர்ந்து என் குடும்பத்திற்கு மட்டுமே பணியாற்ற ஆதரவளித்து வரும் நல்உள்ளங்களை நினைத்து நெகிழ்வு கொள்கிறேன் என முரசொலியில் தலையங்கம் எழுதுவது போன்ற கனவை விதைக்கிறேன்.
ஜெயலலிதாவின் கனவில்:
ஆடம்பரம், ஆணவம், திமிர், சுயநலம், இன்னபிற தீங்கான உள்ளுணர்வுகளை அழித்து விட்டு கொடநாடு ஓய்வு ரகசியம், சசிகலாவோடு
பிரிக்க முடியாத நட்பின் ரகசியம், சட்டத்துக்கு புறம்பான சொத்துக்கள் விபரம், செய்த குற்றங்களின் விபரம் போன்ற ரகசியங்களை கனவின் மூலம் திருடிக் கொண்டாலே போதும். புதுக் கனவுகளை விதைக்க வேண்டிய அவசியமில்லை.
இந்த இன்செப்ஷன் ப்ராஜக்ட் வெற்றி பெற்றால் இந்தியா எப்படிப்பட்ட நாடாக இருக்கும் என்பதை அவரவர் சிந்தனைக்கேற்ப கற்பனை செய்து கொள்ளும்
சுதந்திரத்தை சுயமனதோடு அளிக்கிறேன்...

No comments: