Sunday, February 20, 2011

மழையோடு பேசும் கவிதைகள்...

நேற்று "இவளுக்கு இவள் என்றும் பேர்" என்கிற கார்த்திகாவின் கவிதைத் தொகுப்பை படித்தேன். இவரின் இந்த முதல் கவிதைத் தொகுப்பு உயிர்மை வெளியீடாக வந்திருக்கிறது. கார்த்திகாவின் சொந்த ஊர் திருநெல்வேலி. தமிழில் முதுகலைப் பட்டமும், M.Phil பட்டமும் பெற்றவர். தற்போது பெங்களூரில் வசித்து வருகிறார்.
அந்தத் தொகுப்பிலிருந்து சில கவிதைகள்...

தீராத மழை
-------------------------
ஜன்னல் கம்பிகள்
செலவழிக்கின்றன
சற்றுமுன் சேமித்த மழையை

என தொகுப்பு முழுக்க பெய்யும் மழையில் நம்மை கைபிடித்து அழைத்துச் செல்கிறார். மழையைப் பற்றிய அவரின் சிறுசிறு சிந்தனைகளும் கவிதையெனும்
பெருவெள்ளமாய் பெறுக்கெடுத்து ஓடுகின்றன.

சிறுமிகள் நிறைந்த என் தெரு
-------------------------------------------
விடுமுறை நாளொன்றில்
தெருவெங்கும் தூறல் போல் இலையுதிர்க்கும்
கீழை வீடுகளின் மரங்களின் உச்சியில்
வெயில் வீசும் நேரத்தில்,
வாசலில் அமர்ந்து - புத்தகம் ஒன்றை
வாசிக்கும் பாவனையில் கவனித்தேன்
சிறுமிகளால் நிறைந்து
களை கட்டும் என் தெருவை.
குட்டி மிதி வண்டி ஓட்டிச் செல்லும் ஒரு சிறுமி,
நெட்டிலிங்க மரத்தருகே கயிறாடும் ஒரு சிறுமி,
முற்றத்தில் கயிற்று ஊஞ்சல் ஆடுகிற ஒருத்தி,
எட்டி நின்று ஆட்டி விட அவள் பின்னே இன்னொருத்தி,
ரிங்கா ரிங்கா ரோசெஸ் ஆடுகிற மூவர்,
சுற்றி நின்று ரசிக்க அங்கு பல நேயர்,
தாயின் கை பற்றித் தத்திச் செல்லும் இங்கொருத்தி,
மாடியில் நின்று கொண்டு பட்டம் விடும் அங்கொருத்தி,
வாசிக்கும் பாவனையில்
கவனிக்கும் போது தோன்றியது
விடுமுறை நாளில் என் தெருவில்
வேறு யாருமே இல்லை சிறுமிகளன்றி.
கவிஞர் யாரேனும்
கடந்து சென்றால் என் தெருவைக்
கவிதையில் பதிவு செய்யக்கூடும்
சிறுமிகளால் நிறைந்திருக்கும் தெரு என்று.
எனது கவலை எல்லாம் ஒன்று தான்,
புத்தகம் வாசிக்கும் சிறுமியாக
பதிவு செய்யப்படலாம்
என் பெயரும் தவறாக என்று தான்.
ஒரு விடுமுறை நாளொன்றில் தான் கண்ட அனுபங்களை இயல்பாய் இருக்கும் வார்த்தைகளின் மூலம் கவிதையின் மொழியை சுலபமாக்குகிறார்.

ஈரம் உலராத கதைகள்
--------------------------------
ஒவ்வொரு முறையும்
உலராத ஈரத்துடன்
புதுப்புதுக் கதைகளைச்
சலிக்காமல் சொல்கிறது
சுவாரஸ்யமாகவும்- இந்த
வேலையற்ற மழை.

தூஉம்
--------------
இன்றும் நாம்
உணவாய் அருந்தினோம்
என்றோ பெய்த மழையைத்தான்.

தனது முதல் கவிதைத் தொகுப்பிலேயே இத்தனை பெரிய உயரத்தை எட்டி இருக்கும் கவிஞர் கார்த்திகாவை இந்த வலைப்பதிவின் மூலம் வாழ்த்துகிறேன்.

No comments: