Sunday, February 27, 2011

அர்த்தமற்றுப்போன அரசியல்

தமிழகத்தில் தேர்தல்களம் சூடுபிடிக்கத் தொடங்கி விட்டது. மாநிலத்தின் அடுத்த முதல்வர் யார்? என்பதை எல்லோரும் ஓரளவிற்கு ஊகித்து விட்டனர். மொத்தத்தில் யார் ஆட்சிப் பொறுப்பிற்கு வந்தாலும் ஊழலும், கொலைகளும், கொள்ளைகளும் நிற்கப் போவதில்லை. விதியென யாருக்காவது ஓட்டுப் போடும் வாக்காளர்களே அதிகம். இதற்கு காரணம் நாட்டு நலனில் உண்மையான அக்கறை கொண்ட ஒரு நபரால் இன்றைய தேர்தலில் போட்டியிடுவதற்கான சூழ்நிலையோ, அறுகதையோ இல்லை.
பலமான சாதிப் பிண்ணனியும், பணபலமும் இருப்பவர்களுக்கான களமாகவே ஒட்டுமொத்த இந்திய அரசியலின் தேர்தல் தகுதிகளாக ஆக்கப்பட்டு விட்டன.
தேர்தலில் நிற்கக் களமிறங்கும் ஒவ்வொரு வேட்பாளரும் தத்தம் தொகுதிகளுக்கு குறைந்தது ஐந்து கோடியாவது செலவு செய்யத் தயாராக தங்கள் கட்சியின் தலைமை அலுவலகங்களில் காத்துக் கிடக்கின்றனர். அது தவிர ரவுடிசமும், சட்டம் ஒழுங்கை சீர்குலைப்பவனையும் ஒவ்வொரு அரசியல் கட்சிகளும் வேட்பாளர்களாக உருவாக்கி விட்டுள்ளனர். இப்படிப்பட்ட வேட்பாளர்களை நாம் பதவி நாற்காலியில் அமர வைத்து விட்டு, அவர்களிடம் சமதர்மம், அறநெறி ஒழுக்கத்தை எல்லாம் எதிர்பார்த்தால் நமக்கு எப்படி கிடைக்கும். இதைவிட முட்டாள்தனம் வேறெதுவும் இல்லை.
கடந்த இருபது ஆண்டுகளில் நம் நாட்டு அரசியல்வாதிகளும், அதிகாரிகளும் கையாண்ட முக்கிய ஊழல்கள் பட்டியல்:
1. அர்சத்மேத்தா ரூ.4000/- கோடி
2. கேத்தன்பரேக் ரூ.2000/- கோடி
3. ஐ.பி.எல். லலித்மோடி ரூ.12000/- கோடி
4. ஹவாலா மோசடி ரூ.600/- கோடி
5. லாலு கால்நடை ஊழல் ரூ.900/- கோடி
6. சத்தியம் ஊழல் ரூ.14000/- கோடி
7. டெல்லி முத்திரைத் தாள் ஊழல்கள் ரூ.12000 கோடி
8. காமன்வெல்த் போட்டி சுரேஸ்கல்மாடி ஊழல் ரூ.70000/- கோடி
9. ரோசய்யா நிலஒதுக்கீடு ஊழல் ஊழல் ரூ.200/- கோடி
10. ஸ்பெக்ட்ரம் ஊழல் ரூ.1,76,400/- கோடி
அரசியல்வாதிகளும், அதிகாரிகளும் அவரவர் சக்திக்கும், திறமைக்கும் ஏற்ப எவ்வளவு முடியுமோ அவ்வளவிற்கும் சுரண்டிச் சுரண்டி நம் தேசத்தை சீர்குலைத்து விட்டிருக்கின்றனர். மக்களின் வரிப் பணத்தை நாட்டின் வளர்ச்சிக்குப் பயன்படுத்தாமல் போட்டி போட்டுக் கொண்டு இலவசங்களை வாரியிறைத்ததும், கடன்களை தள்ளுபடி செய்ததும் நாட்டின் வளர்ச்சிக்குப் மிகப் பெரிய பின்னடைவைத்தான் ஏற்படுத்தியிருக்கிறது.
இவர்கள் வெளிநாட்டு வங்கிகளில் பதுக்கி வைத்திருக்கும் பணத்தை பறிமுதல் செய்தாலே நாட்டின் வறுமைக் கோட்டிற்கு கீழே யாரும் இருக்க மாட்டார்கள்.
இவர்களுக்கு அளிக்கப்பட்டு வரும் பாதுகாப்பு செலவையும், பிரத்யேக சலுகைகளையும் கணக்கிட்டால் அந்தத் தொகையில் எல்லோருக்கும் இலவச கல்வியை அளிக்கலாம். இவர்களின் ஒட்டு மொத்த ஊழல் பணத்தைக் கணக்கிட்டால் உலகின் பெரிய பணக்கார நாடாக இந்தியா இருக்கும்.
இது போன்ற தீய சக்திகளினால் தான் விலையேற்றம்,
பொருளாதார நெருக்கடி என மக்களை கசக்கி பிழியும் சூழல் ஏற்பட்டுள்ளது.
1950-ல் உருவாக்கப்பட்ட அரசியல் அமைப்புச் சட்டங்கள் எல்லாம் தற்போது காணாமலே போய் விட்டன. இப்போது நமது உடனடித் தேவையே இந்த நாட்டைப் பற்றியும், நாட்டு மக்களைப் பற்றியும் அக்கறையோடும், உண்மையாக செயல்படவும் ஒரு மாற்று சக்தி அவசியம் உருவாக வேண்டும். ஒரு எகிப்தைப் போலவும், ஒரு லிபியாவைப் போலவும் நம் நாட்டிலும் புரட்சி வெடிக்கும் காலம் வெகுதூரம் இல்லை.

No comments: