Sunday, March 13, 2011

நடமாடும் நட்சத்திரங்கள்

நிஜம் தான்
பெண்களின் உலகம்
தனித்துவங்களால் நிரம்பியது.

பேரண்டத்தையே சுத்தப்படுத்தி விடும்
அவளது கூச்சப் பார்வை
இதழோரம் வடியும் இனிய சிரிப்பில் தான்
பலரின் இதயங்கள் விட்டுவிட்டு
துடித்துக் கொண்டிருக்கின்றன.
குடைசாயும் வெட்கத்தில் தான்
ஆண்களின் மனவானில் கருமேகங்கள்
சூழ்ந்து கொள்கின்றன.
தனது அழுகையால் இந்த உலகையே
ஸ்தம்பிக்கச் செய்யும் சக்தி படைத்தவள்.
அழகிற்கு திருஷ்டிப்பொட்டாய்
அவ்வப்போது எட்டிப் பார்க்கும் கர்வம்.
அச்சம், மடம், ஞானம் என
கருவறையிலேயே பல பாடங்கள்
கற்றுத் தேர்ந்தவள்.

சொப்பு பொம்மை விளையாடிக் கொண்டிருப்பவளை
பெரியவளாக்கி பார்க்கிறது இந்த
அவசர உலகம்
விண்மீனாய் நீந்திக் கொண்டிருப்பவளை
தாவனியில் சிறை பிடிக்கிறது இந்த
முரட்டு சமூகம்
சரியாய்க் கிடக்கும் மாராப்பையும்
அனிச்சையாய் சரிசெய்கிறது அவளது
கூச்சத்தின் கைகள்
ஏற்றாத அகல் விளக்காய் இருப்பவள், புகுந்த வீட்டில்
தன்னை தினம்தினம் எரித்துக் கொள்கிறாள்
கணவனின் காதலையும், காமத்தையும்
இரவு பகல் பாராமல் தாங்கிக் கொள்ளும்
சுயநலமற்ற சித்திரம்
இப்போது,
இன்னொரு உயிரை உற்பத்தி செய்யும்
கடவுளாக பதவி உயர்வு பெற்று விட்டாள்

நிஜம் தான்
பெண்களின் உலகம்
தனித்துவங்களால் நிரம்பியது.

2 comments:

She-nisi said...

நிஜம் தான்
பெண்களின் உலகம்
தனித்துவங்களால் நிரம்பியது.

வாழ்த்துக்கள் அன்பரே!

......நான் எனப்படுவது யாதெனில்... said...

தங்களின் மேன்மையான கருத்திற்கு நன்றி